ANTALYA - OHD’ê, li pêşiya Girtîgeha Antalyayê daxuyanî da û banga tehliyeya girtiyê nexweş ê rewşa wî giran Devrîm Ayik kir. 

 

Nûnertiya Komeleya Hiqûqnasên ji bo Azadiyê (OHD) ya Antalyayê, ji bo ji girtiyên nexweş Devrîm Demîr ê li Girtîgeha Tîpa S a Antalyayê tê ragirtin û rewşa wî giran e, li pêşiya girtîgehê daxuyanî da. Tevî Parlamentera Partiya Wekhevî û Demokrasiyê ya Gelan (DEM Partî) a Bedlîsê Semra Çaglar Gokalp, dayika Ayik Hulya Ayik û gelek kes beşdarî daxuyaniyê bûn.

 

BINPÊKIRINA MAFÊ JIYANÊ

 

Parêzer Şuheda Ronahî Çîftçî ya ku daxuyanî da, diyar kir ku jiyana Ayik di bin xetereyê de ye û mercên girtîgehê ji bo tedawiyê ne guncav e. Herwiha Şuheda Ronahî Çîftçî, li dijî redkirina serlêdanên ji bo tehliyeya Ayik hatine kirin bertek nîşan da û wiha axivî: “Tedawiya Ayik bi awayeke bêhiqûqî ji aliyê Lijneya Tenduristiyê ve hatiye astengkirin. Ev biryar bê exlaqî ye, li ne hiqûqî ye û cezayeke raste rast e. Ev biryar, ‘binpêkirina mafê jiyanê’ ya Destûra Bingehîn e.” 

 

BANGA TEHLIYEYÊ 

 

Şuheda Ronahî Çîftçî, ji bo rewşa bangî saziyê têkildar kir û got: “Di rewşa Ayik de ev kiryarên dermirovî bi awayeke sîstematîk rewa tê dîtin em bang dikin ku em ê nebin şîrikê vî sûcî û vê rewşê qebûl nekin. Bi hezaran girtî û hikûmxarên nexweş jiyana wan di xetereyê de ye û bi awayeke bêdeng mehkûmê mirinê hatine kirin. Divê Ayik tavilê bê berdan û bêyî astengî bigihîje mafê tedawiyê.” 

 

Parlamentera Wekhevî û Demokrasiyê ya Gelan (DEM Partî) a Bedlîsê Semra Çaglar Gokalp û dayika Ayik Hulya Ayik jî xwestin Devrîm Ayik bê tehliyekirin.