STENBOL/ENQERE – Di çalakiya Stenbol û Enqereyê de daxwaza tehliyeya girtiyên nexweş Adnan Oztel û Mehmet Tahîr Avci hat kirin.

 

Komîsyona Girtîgehê ya Şaxa ÎHD’ê ya Stenbolê, li pêşiya avahiya komelê ya li Beyoglûyê ji bo balê bikşîne ser rewşa girtiyên nexweş çalakiya “Rûniştina F’ê” ya 710’emîn li dar xist. Di çalakiya vê hefteyê de bal kişandin ser rewşa Adnan Oztel ê ku li Girtîgeha Tîpa F a Tekîrdagê tê ragirtin. Di çalakiyê de pankartên “Bila girtiyê nexweş Adnan Oztel bê berdan”, “Tedawî heq e nayê astengkirin” hatin hilgirtin û dirûşmên Bila girtiyê nexweş Adnan Oztel bê berdan”, “Tedawî heq e nayê astengkirin”, “Bila girtiyên nexweş bên berdan” hat berzkirin.

 

Metna daxuyaniyê ji aliyê endamê Komîsyona Girtîgehê ya Şaxa ÎHD’ê ya Stenbolê Mehmet Acettîn ve hat xwedin. Acettîn, diyar kir ku di 6 mehên dawî de rewşa tenduristiya Oztel xirabtir bûye û nexweşiya wî ya fetqa piştê, homoroît û Behçet lê giran bûye.

 

Acettîn, rave kir ku ji ber nexweşiya Behçetê çavê wî noqsan bûye û nexweşiya mîdeyê lê giran bûye û Oztel bi alîkariya hevalên xwe ve jiyana xwe didomîne.

 

 ‘TEDAWIYA WÎ NAYÊ KIRIN’

 

Acettîn, diyar kir ku Oztel 20 sal e girtî ye û gotinên wasiyê wî wiha parve kir: "Berî 13 salan min Adnan nas kir. Ev 12 sal in nexweşiya Behçetê lê peyda bûye û ji ber vê nexweşiyê çavê wî noqsan bûne. Nexweşiya wî nayê tedawî kirin. Bi hewldanan me ve dest bi rêbazeke nû ya tedawiyê kir û korbûna wî ji sedî 40 rawestiye. Di mercên girtîgehê de tedawiya wî zehmet e.  Em li ser jiyana wî bifirkar in. Hêj 10 sal mane heta ku were berdan, di van şert û mercan de ne pêkan e ku ewqas sal bijî.” 

 

ENQERE

 

Însiyatîfa ji Girtiyên Nexweş re Azadî, di çalakiya 582’yemîn a ji bo rewşa girtiyên nexweş de, bal kişand ser rewşa Mehmet Tahîr Avci yê ku li Girtîgeha Hejmar 1 a bi Ewlekariya Bilind a Sincanê tê ragirtin. Di çalakiyê de pankarta “Tedawî heq e nayê astengkirin, bila girtiyên nexweş bên berdan” hatin hilgirtin û metna daxuyaniyê ji aliyê Rêvebira Şaxa ÎHD’ê ya Enqereyê Kezban Kalin ve hat xwendin.

 

Kezban Kalinê diyar kir ku emeliyata Avci di 9’ê Gulana 2025’an li Nexweşxaneya Perwerde û Lêkolînê ya Sîncanê hatibû plankirin, lê ji ber nebûna "personel û wesayîtên cendermeyan" hatiye betalkirin û ev tişt got: "Îfadeyên berê yên Mehmet Tahir Avci eşkere dikin ku ew di lênihêrîna tenduristiyê de rastî muameleya cudakar û xirab hatiye. Herwiha di dema girtina xwe de li Nisêbînê ji ber şarapnelê zirar daye kezebê, dermankirina kêm, azarên ji karmendên nexweşxaneyê, muayeneyên kelepçekirî û daxuyaniyên nefretê re rû bi rû maye. Niha, du caran krîzên dil derbas kiriye, stent li ser dilê wî bi cih kirine, du damarên wî yên koronar girtî ne û li benda emeliyatê ye. Divê dawî li pêkanînên tundiyê ku tedawiya kelemçekirî were anîn û  vebijarka paşxistina cezayê wî, li gorî xala 16'an a Qanûna Hejmar 5275'ê, bi raporên lezgîn ji Tiba Edlî û desteyên bijîşkî yên serbixwe bi lez were nirxandin."