Têkildarî 1’ê Mijdarê Roja Kobanê ya Cîhanê, Tevgera Jinên Azad (TJA), Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û Însiyatîfa Yekitiya Demokratîk daxuyanî dan. 

 

DBP’ê di daxuyaniya xwe de destnîşan kir ku 1’ê Mijdarê Roja 1’ê Mijdarê Roja Kobanê ya Cîhanê ya ku bûye sembola îradeya jiyana azad û berxwedana hevpar a gelan û wiha hat destnîşankirin: “Berxwedana efsûnî ya ku di sala 2014’an de li hember taritiya çeteyên DAÎŞ’ê destpêkir, bi tevî taybetiyên xwe ve hêj jî bandor li konjuktura siyasî û civakî ya Rojhilata Navîn dike. Di rêwitiya ber bi têkoşîna xwerêveberina cewherî de, di pêşxistina paradîgmaya jina azad de û di avakirina jiyaneke nû ya demokratîk de Kobanê, ji gelên cîhanê re bû çavkaniya hêz û baweriyê. Berxwedana ku bingeha xwe ji Manîfestoya Civaka Demokratîk a Birêz Ocalan digre, li dijî modernîteya kapîtalîst bû navnîşana serkeftina modernîteya demokratîk. Bi vê serkeftinê ve ne tenê ji bo gelê Kurd, ji bo tevî gelên bindest deriyên modela jiyana nû vebû.”

 

PARASTINA KOBANÊ 

 

Di berdewamiya daxuyaniyê de wiha hat gotin: “Li hember pergala netew-dewlet a ku nirxên azadî û demokrasiyê hedef digre, Rojhilata Navîn îro di warê pergala demokratîk de li ber banga serdemeke nû ye. Ketina Rejîma Baasê û destkeftiyên Rêveberiya Xweser a Bakur û Rojhilatê Sûriyeyê mînakên herî şênber ên vê rastiyê ne. Ji şûna polîtîkayên ku wek sînoran nirxên gelan perçe dike, hêviya veguhestina demokratîk her ku diçe bihêz dibe. Ev pêvajoya ku bi berxwedana Kobanê ve destpêkir û bi şoreşa Rojava re derket qonaxeke nû, îro ji bo gelên Rojhilata Navîn pêşerojeke nû kêlî bi kêlî ava dike. Di vê pêşerojê de ji bo tevî bawerî, çand, nasname û cudahiyan azadî, wekhevî û edalet cih digre.

 

Ji ber vê ku; feraseta ku ‘’xeyalê ketina Kobanê dikir’’ bi salan e bi doz û darizandinên tolhildanê, bi siyaseta gef û planên qirêj hewl dide hem îradeya Kobanê û hem jî destkeftiyên şoreşê bifetisîne. Li hember vê rastiyê, divê xwedîderketina Kobanê wek berpirsyariyeke ehlaqî û polîtîk di rojeva cîhanê de be. Ev yek jî encax li ser esasên rêya sêyemîn, bi pêşxistina siyaseta demokratîk mumkun e.

 

Bi vê mabestê em careke din berxwedana sedsalê silav dikin û tevî cangoriyên ku mohra xwe li dîrokê xistin bi minet û bi rêzdarî bi bîr tînin.”

 

TJA: JI BO AZADIYA JINÊ BERPIRSIYARÎ DA SER MILÊ ME

 

TJA’yê di daxuyaniya xwe de diyar kir ku bi pêşengiya jinê ve têkoşîna li dijî DAIŞ’ê hatiye avakirin û wiha diyar kir:  “Di sedsala 21an de jî li dijî nirxên jiyanê yên jinan, nirxên xwezayê, nirxên çandî DAİŞ, wekî amûrekî şer li hemberî ne tenê gelê Rojava, li hemberî gelên cîhanê li ser axa Kurdistanê hat şandin. Qirkina jinan, jenosîda çandî, ekoqirkirinê bi tevahî bi destê vê rêxistinê xwest ku pêk bînin. Lê bi berxwedaneke civakî ya ku di tu serdemên dîrokî de nehatîye dîtin, bi pêşengîtiya jinan hat tunekirin.

 

Ev berxwedan di heman demê de bû veguherîn û xweparastineke berxwedêr. civakê, nirxên demokratîk, azadiya jinan û hêmanên ekolojîk jî ji nû ve ava kirin. Ev şerê ku li dijî gelên cîhanê, jinên cîhanê hatî kirin, bi parastina civakê ya bi pêşengiya jinan, bi şoreşa jin jiyan azadî, hat şikandin û gelan bi berxwedan û avakirina civaka demokratîk pêk anî. Hem rizgarkirina Kobanê hem jî şoreşa jin jiyan azadî li ser vê bingehê, wekî diyarî hat pêşkêşkirin hemû jinên cîhanê, gelên cîhanê bûn perceyek yê vê xwedana azadiya jinan.

 

Em jî îro, rizgarkirina Kobanê û ji nû ve avakirina Rojava bi nirxên jinan îlham digirin, wekî jin, bi hêza xwe, bi îradeya xwe û bi rêxistinkirina xwe ya xwesar a bi taybetî, berpirsiyariya xwe ya dîrokî bi cih tînin û avakirina civaka demokratîk her dem didomînin.”

 

DEM PARTÎ: EM ŞOREŞA KOBANÊ SILAV DIKIN

 

Partiya Wekhevî û Demokrasiyê ya Gelan (DEM Partî) di daxuyaniya xwe ya têkildarî 1’ê Mijdarê Roja Kobanê ya Cîhanê de ev tişt got: “Em salvegera 11’emîn a serkeftina Kobanê ya mirovahiyê ku bi pêşengiya jinan, li dijî DAIŞ’ê li Bakur û Rojhilatê Sûriyeyê hat bidestxistin, silav dikin.

 

Di vê serdema dîrokî de, encamên giran ên civakî yên şerên ku navenda wan Rojhilata Navîn e, careke din girîngiya jiyanî ya Banga Aştî û Civaka Demokraîk a rêzdar Abdullah Ocalan nîşan didin. Nakokiyên neteweperest û mezhebî û kûrbûna nakokiyên civakî li Sûriyeyê, ku ji aliyê hêzên kûrewî ve bi rêya dewletên neteweyî ve hatine destpêkirin, nîşan dane ku pergala civakî ya ku li Rojava pêk hatiye alternatîfek tekane ye.

 

Em Şoreşa Kobanê ya ku tê de gel bi bawerî û hevgirtinê çarenûsa xwe nivîsand, bi ruhê paradîgmaya Aştî û Civaka Demokratîk a ku ji aliyê rêzdar Abdullah Ocalan ve hatî pêşxistin, silva dikin. Em biryardariya xwe ya ji bo pêşxistin û parastina vê têgihîştina şoreşgerî dubare dikin. 1’ê Mijdarê Roja Kobanê ya Cîhanê, li hemû gelên cîhanê, bi taybetî li gelê Kurd pîroz be.”

 

ÎNSIYATÎFA YEKITIYA DEMOKRATÎK: SERKETINA GELAN

 

Însiyatîfa Yekitiya Demoktratîk di daxuyaniya xwe de 1’ê Mijdarê Roja Kobanê ya Cîhanê pîroz kir û diyar kir ku Kobanê, serketina gelan, baweriyan û ya jinan e û wiha got: “Kobanê di heman demê de serfiraziya hemû gelan, baweriyan û jinan e. Kobanê bi têkoşîna xwe ya bêhampa, îro remza nirxên mirovahiyê ye, sembola jiyaneke bi rûmet e, qada xwişk û biratiya gelan e. Çîrûska rizgariyê li wir bi dirûşmeya “Jin, Jiyan, Azadî” veda û hê jî li seranserê cîhanê deng dide. Ji ber van sedeman 1ê Mijdarê ji aliyê gelên cîhanê, rewşenbîr, şoreşger, rêxistinên civakî yên sivîl û xelatgirên Nobelê wek Roja Kobanê hat ragihandin. 

 

Em bang li Hikumeta demkî ya Sûriyeyê dikin ku di serî de Kurd, Durzî, Ereb, Elewî û Mesihî divê tu kes di pergala nû ya Sûriyeyê de tune neyên hesibandin. Di vê çarçoveyê de divê dev jî hemû polîtîkayên pişaftin û helandinê were berdan û gavên entegrasyona demokratîk werin avêtin. Lewra li Sûriyeyê û li hemû Rojhilata Navîn, siberojeke xweştir ancax bi helwesteke aştiyane û demokratîk pêkan e. 

 

Bi van hest û nêrînan, em cardin ruhê azadiyê ku 11 sal berê li dijî êrîşên DAIŞ a hov li dor Kobanê kom bûbû bi rêzdarî silav dikin û 1ê Mijdarê Roja Kobanê ya Cîhanê pîroz dikin.”