Hêzên Ked, Aştî û Demokrasiyê ya Stenbolê dê bi boneya 1’ê Îlonê Roja Aştiyê ya Cîhanê, li Qada Rihtimê ya Kadikoyê bi dirûşma “Li dijî şer û kedxwariyê dê demokrasî û aştî bi ser keve" mitîngê lidar dixe. Partiyên siyasî, rêxistinên civaka sivîl û înîsiyatîf, beriya mitîngê li Rawestgeha Sogutluçeşmeyê hatin gel hev. Girseyê li vir stran got, govend gerand û bi dovîz û dirûşman bal kişandin ser israra xwe ya di aştiyê de. Girseyê gelek caran dirûşmên “Bijî Serok Apo” û “Jin, jiyan, azadî” berz kir. 

 

DAXWAZÊN XWE BI PANKARTAN VEGOTIN 

 

Hêzên Ked, Aştî û Demokrasiyê pankarta “Li dijî şer û kedxwariyê dê demokrasî û aştî bi ser keve” hate hilgirtin û dest bi meşê kirin. Înîsiyatîfa Dayikên Aştiyê bi pankarta “Hawirdora aştiyê ew e ku em bikaribin bi zimanê xwe yê dayikê li her derê bi serbestî biaxivin”, Înîsiyatîfa Pêdiviya Min bi Aştiyê heye bi pankarta “Dengê aştiyê em bi piştevaniya jinê diqîrin”, DEM Partî bi “Ji bo civaka demokratîk deng bide aştiyê”, Meclisa Jinan a DEM Partiyê bi pankarta “Rêya aştiyeke birûmet civaka sosyalîst demokratîk û azadîxwaz e”, Meclisa Ciwanan a DEM Partiyê bi pankarta “Bi hevrêtiya komunalîst em tecrîdê dişikînin” û MATUHAYDER jî bi pankarta “Dawî li taloqkirina tehliyeyan bînin ji girtiyan re azadî” meşiya. 

 

BAL KIŞANDIN SER PERWERDEYA BI ZIMANÊ DAYIKÊ

 

Di meşê de girseyê her wiha bi pankartên xwe bal kişandin ser gavên ji bo civaka demokratîk û daxwaza perwerdeya bi zimanê Kurdî kirin. 

 

WÊNEYÊN JINÊN HATIN QETILKIRIN HATIN HILGIRTIN

 

Dayikên Aştiyê, di meşê de wêneyên rojnameger Hêro Bahadîn ku li navçeya Seyîdsadiq a Silêmaniyeyê di êrişa Tirkiyeyê de hatibû qetilkirin, endama Navenda Jineolojiyê rojnameger-nivîskar Nagihan Akarsel ku li Silêmaniyeyê hatibû qetilkirin û Dayikên Şemiyê û Dayikên Aştiyê yên jiyana xwe ji dest dayin jî hilgirtin. 

 

MEŞA JINAN

 

Jinên ku bi cilûbergên Kurdî, bi şalên kesk, sor û zer pêşengtiya meşê kirin, tililî avêtin û gelek caran dirûşmên “Bijî berxwedana zindanan”, “Bila zindan birûxin ji girtiyan re azadî”, “Bijî Serok Apo”, Bê Serok jiyan nabe”, “Gelê Filistînê bi tenê nîne” û “Bijî berxwedana Rojava” berz kir. 

 

Girse, bi awayê kortejan têket Qada Rihtimê. Mitîng, bi rêzgirtinê dest pê kir. Piştre jî metna hevpar hate xwendin. Kurdiya metnê ji hêla Zeynep Yildirim û ya Tirkî jî Nebîl Sarikaya xwend. 

 

TEKANE RÊ TÊKOŞÎN E 

 

Di daxuyaniyê de hate gotin ku şer û pevçûn rê li ber xizanî, kedxwarî û koçberiyê vedikin û gel jî li dijî vê ji bo jiyaneke wekhev û demokratîk têdikoşe. Bi domdarî wiha hate gotin: “Mînaka herî dawî ya wêraniya şer li ber vedike jî li Filistînê tê jiyîn. Qirkirin, li pêş çavê hemû dinyayê bi aşkerayî hate ragihandin û tê kirin. Saziyên navneteweyî helwesteke bibandor a ku rê li ber vê komkujiyê bigirin raber nakin, berevajî vê piştgiriyê didin. Gel jî li her devera cîhanê li ser pêyan e, xwedî li mîrasa mirovahiyê derdikevin. Îktîdara siyasî ya li Tirkiyeyê, ji ewil ji bo pêşçavan jî be hinek bertek nîşan dida lê êdî niha nikare wê jî bike. Di heman demê de hikûmeta demkî ya li Sûriyeyê, komkujiyên xwe yên li dijî Durzî û Elewiyan berdewam dike. Ev tevek îspata wê ye bê ka gelên li herêma di bin şert û mercên çiqas zehmet de hewl didin hebûna xwe bidomînin. Tekane rêya pêşîlêgirtina komkujiyên li herêma me, têkoşîna wan a ji bo cîhaneke wekhev, adilane û aştiyê ye. 

 

Di serî de gelê Kurd, di encama têkoşîna bi salan a gelan a ji bo demokrasî û aştiyê, derfetên dîrokî afirîn û niha li ser aştiyê nîqaş tên kirin. Lêbelê, li rexekî li ser aştiyê tê axaftin û li rexa din jî zext didomin. Di rewşeke binakok ku li hundir bêhiqûqtî û zext û li derve jî polîtîkayên şer tên domandin de mimkin nîne ku pêvajoya aştiyê armanc dike pêş bikeve. Ji bo alî, aktorên siyasî bi rehetî bikarin xwe îfade bikin û xebatan bimeşînin, divê zemîneke hiqûqî were avakirin. Vekirina pêşiya hemû qenalên demokratîk ku ji bo tev li pêvajoyê bibin, pêwîstiyeke. Weke Hêzên Ked Aştî û Demokrasiyê yên Stenbolê, em ê têkoşîna xwe ya ji bo pêşerojeke bêşer, bêkedxwarî, laîk û wekhevîparêz bidomînin. Em ê vê zîhniyeta ku zeytûngeh, daristan li pêşiya xebatên madenvaniyê vekiriye û li dijî şînkatî û jiyana ekolojîk şer daye destpêkirin, têk bibin. Tekane rêya gelên me bi ewle û aram bijîn, aştî ye. Dê dinyayeke bêşer û bêkdxwarî bi destên me were avakirin. Em bang li her kesî dikin ku vê hêviyê mezin bikin.” 

 

Mitîng berdewam dike.