STENBOL - Dayikên Şemiyê, vê hefteyê aqûbeta Mûstafa Saygi yê 31 sal berê ku di binçavan de hatibû windakirin pirsin.

 

Dayikên Şemiyê/Mirovên Şemiyê ku her hefte li Qada Galatasarayê li hev kom dibin û aqûbeta xizmên xwe yên di binçavan de hatin windakirin an jî hatin qetilkirin bipirsin hatin gel hev. Ji bo kiryar bên darizandin çalakiya xwe ya 1056'emîn li dar xistin. Gelek kes beşdarî çalakiyê bûn, qurnefîl û wêneyên xizmên xwe yên di dema binçavkirinê de hatin windakirin hildan.

 

Dayikên Şemiyê, di vê hefteyê de aqûbeta Mûstafa Saygi yê ku 31 sal berê li navçeya Pirsûs a Rihayê piştî girtina bin çavan de hatibû windakirin, pirsîn.  

 

Sekereterê Şaxa Komelaya Mafê Mirovan (ÎHD) a Stenbolê Jiyan Kayayê çîroka Saygî xwend û wiha axivî: “Mûstafa Saygiyê yê 30 salî di 3’ê Hezîrana 1994’an de ji bo biçe Pirsûsê bi motorsikletê ve ji malê veqetiya. Di rêya vegerê de li gundê Yogûrtçû yê li Pirsûsê, ji aliyê Tabûra 5’mîn a Komando a di avahiya Karê Avê yê Dewletê de bicihbûyî ve hate rawestandin û binçavkirin. Malbata Mûstafa, roja ewil dema ji jê agahî nestendin li her derê lê geriyan. Gundiyê ku bi navê R.Y. ev agahî dan dayika Mûstafa Ayşe Saygi ‘Ez û Î.Ş. dema ji navçeyê vedigeriyan li ser rêya gundê Yogûrtçû leşkeran em rawestandin. Di heman demê de Mûstafa jî hatibû rawestandin. Li nasnameya me nihirîn û me berdan lê Mûstafa bernedan.’ Ji bilî vê du gundiyên li ber pez ji hevjîna Mûstafa Dûrsûn Saygî re gotine ku wan dîtiye ku leşkeran Mûstafa birine qerekola gundê Yogûrtçû.”

 

BINÇAVKIRINA WÎ HATE ÎNKARKIRIN

 

Jiyan Kaya, diyar kir ku dema malbata Mûstafa çûne qereqola gundê Yogûrtçû, qereqolê ji wan re gotiye ku Mûstafa Saygî li qaraqola navçeyê ye û lêpirsîna wî didome û Jiyan Kayayê di berdewamiya axaftina xwe de wiha got: “Dema Mûstafa venegeriya malê, malbatê li Serdozgeriya Komarê ya Pirsûsê gilî kirin. Dozgerî, li ser daxwaznameyê rewşa Mûstafa ji Fermandariya Bajêr a Navendî dipirse. Fermandariya Bajêr a Navendî jî radigîne ku Mûstafa ne di bin çav de ye.”

 

JI DMME’Ê BIRAYARA ÎHLALÊ

 

Jiyan Kaya, destnîşan kir ku hemû hewldanên malbatê bêencam man û got, "Di Kanûna 2009’an de, motorsîkleteke rizî û parçeyên hestiyan li mezraya Akdogan a gundê Bîlgîn ê li Pirsûsê ji aliyê defînegeran ve hate dîtin. Ev hestî radestî dozgeriyê hatin kirin. Saziya Tiba Edlî ya Stenbolê îdia kir ku hestî yên ajalan in. Ji ber vê sedemê, dozgeriyê di 7’ê Nîsana 2010’an de biryara “hewcedarî bi lêpirsînê nehatiye dîtin” da. Malbatê, ku nekarî ji çareseriyên hiqûqî yên navxweyî encam bigire, serî li Dadgeha Mafên Mirovan a Ewropayê (DMME) da. Di sala 2015’an de, DMME’yê biryar da ku Tirkiyeyê xala 2’yemîn a Peymana Mafên Mirovan a Ewropayê, ku mafê jiyanê rêk dixe, îhlal kiriye."

 

‘EM Ê HER LI DÛ EDALETÊ BIN’

 

Jiyan Kayayê gotina xwe wiha bi dawî kir: “Li ser windakirina Mûstafa de 31 sal derbas bû. Ji bo malbata Saygi dem rawestiya ye lê dewlet bi hinceta demborînê ve lêgerîna wan a ji bo edaletê paşguh dike. Çen sal derbas bibe jî em ê dîsa ji bo Mûstafa Saygi û hemû windahiyên xwe dev ji lêgerîna edaletê bernedin.”

 

Çalakî, bi danîna qurnefîlan li Qada Galatasaray ve bi dawî bû.