Li Kurdistanê nûnerên 24 rêxistinên jinan û partiyên siyasî hatin gel hev û Platforma Yekitiya Jinên Kurd ava kirin.

 

Di daxuyaniya platformê de wiha hate gotin: 

 

“Em di pêvajoyeke ku pergala cîhanê tê dîzaynkirin de dijîn. Di Şerê Cîhanê yê Yekem de, dîzaynkirina sîstema cîhanê bi avabûna dewletên netewe li Rojhilata Navîn û parçebûna Kurdistanê bû. Piştî sedsalekê, em ketin pêvajoyeke dîzaynkirinê ku di encamê de dewletên netewe hatin hilweşandin. Ya ku ev guhertin pêk anî, têkoşîna azadiyê bû ku gelê me yê sed salî di bin dagirkerî û qirkirinê de bû, li her çar parçeyan bi êşên mezin li ber xwe da. Bi dilsoziya gelê Kurd a ji bo azadiyê û têkoşîna xwe ya bê westan pergala qirker û dagirker îflas kiriye. Lê belê di vê pêvajoya dîrokî de hem xeterî û hem jî derfetên mezin ên azadiyê hene. Di Şerê Cîhanê yê Yekem de jî wek gelek netewên din soza dewletbûnê ji gelê Kurd re hat dayîn û nexşe hatin xêzkirin, lê serokên gelê Kurd tenê bi herêmên xwe ve sînordar man, bi yekitî tevnegeriyan û encam bi Peymana Lozanê bû çar parçe û welat înkar kirin. Ji ber vê sedemê ji bo ku pêvajo di berjewendiya gelê me de bi serkeftî bi dawî bibe, yekane tişta pêwîst ew e ku yekitiya neteweyî pêk were. Ger nebe gelê me tu îradeya siyasî efû nake.

 

YEKITIYA NETEWÎ JI BO ME JINÊN KURD TÊ WATEYA AZADÎ Û RÛMETÊ

 

Ji bo me jinên Kurd yekitiya netewî tê wateya azadî û rûmetê. Kurdistan di bin dagirkeriyê de tê wateya ku bedena jinê di bin dagirkeriyê de ye. Jinên Kurd ev sed sal in di bin kolonyalîzma hovane de dijîn, destavêtin, komkujî û revandin. Kolonyalîzm pirsgirêka jinê ye û ji bo azadiya jinê şertê yekemîn rizgarbûna ji dagirkeriyê ye. Parçebûna neteweyî bingehê domandina dagirkeriyê dide. Yekane rêya ji holê rakirina sedemên tundî û koletiya li ser jinan li Kurdistanê yekitî û çalakiya hevpar a di nava yekitiya neteweyî de ye. Di vê wateyê de yekitiya neteweyî ji bo me jinên Kurd têkoşîna azadiyê ye.

 

HER SAL DÊ LI PARÇEYEKÊ MIHRÎCANA JINÊN KURD BÊ LIDARXISTIN

 

Li ser vê bingehê em weke nûnerên 24 rêxistinên jinan û partiyên siyasî yên ji çar parçeyên Kurdistanê, di bin navê ‘Civîna yekitiya neteweyî ya jinên Kurd’ de ji bo pêşxistin û avakirina yekitiya neteweyî de di 7’ê Nîsana 2025’an hatin cem hev. Bi kurtasî mijar û biryarên me yên nîqaşê yên bingehîn; yekitiya neteweyî teng nebînin yekitiya partiyên siyasî û li ser esasê rêxistinbûna demokratîk û yekitiya siyasî ya demokratîk pêş bixin. Di hemû aliyên civakî, aborî, siyasî, çandî, perwerdeyî, hiqûqî, şaredarî, parlamenterî û sendîkayên çandî de yekitiya neteweyî pêş bixin. Her sal li parçeyekî Kurdistanê Mihrîcana Jinên Kurd bê lidarxistin. Ji bo zarokên mexdûrên şer û xizaniyê yên li çar parçeyên Kurdistanê toreke hevpar a hevpar bê avakirin. Ji bo di demeke nêz de konferansa jinên Kurd a netewî bê lidarxistin. Ji bo pêkanîna van biryaran weke ‘Platforma Yekitiya Jinên Kurd’ xwe bi rêxistin bikin.

 

BANG LI HEMÛ JINÊN KURD KIRIN

 

Banga me ya weke ‘Platforma Yekitiya Jinên Kurd’ ji hemû jinên Kurd re ev e; em bang li hemû nûnerên jinên siyasî, tevger û rêxistinên jinan ên li Kurdistan û dîasporayê dikin ku beşdarî vê platformê bibin. Werin em bi hev re yekitiya neteweyî wekî hezkirina azadiyê, hişmendiya wekheviyê û erkek mezin a welatparêziyê ava bikin. Li Kurdistanê bêyî yekitiya neteweyî ti têkoşîn û siyaset bi ser nakeve. Dîrok li ber me hemûyan îmtîhanek daye; divê jinên Kurd û gelê Kurd vê carê yekitiya neteweyî pêk bînin, eger nebe her parçebûn wê bibe sedema berdewamiya dagirkeriyê û windakirina destkeftiyan. Ger em yekitiya neteweyî pêk bînin, wê Kurdistana azad û statûya jina azad weke rojê li ser axa me derkeve. Werin em hemû bi hev re vê tavê li welat hilînin.

 

DEMA HIZRA HEVPAR A KURDAN HATIYE

 

Banga me ji hemû partî û rêxistinên siyasî yên Kurdistanî re ev e; yekitiya netewî di heman demê de pêşxistina demokrasiya Kurdan e. Parçebûn ji nepêşxistina demokrasiya gelê Kurd tê. Yekitî ew e ku mirovên cuda werin cem hev û pirsgirêkên hevpar û çareseriyên hevpar bibînin. Niha dem hatiye ku hizra hevpar a Kurdan pêk were. Bila çarenûsa gelê me û jinên Kurd êdî nebe azar û zilma ji ber parçebûnê. Em bang li her kesî dikin ku ji bo yekitiya neteweyî bi fezîletên bilind tevbigerin, fedekariyên xwe bikin, teng nêz nebin. Weke jin û mêrên Kurd ên azad, em jî weke hemû neteweyên azad, layîqin ku bi azadî û wekhevî di nava yekitiyê de bijîn.”

 

RÊXISTINÊN DI NAVA PLATFORMÊ DE CIH DIGIRIN

 

* Yekitiya Niştimanî Kurdistan  - YNK

 

* Yekitiya Jinên Kurdistan

 

* Rêxrawî Xuşkanî Îslamî Kurdistan

 

* Kongra Star

 

* Tevgera Jinên Azad  - TJA

 

* Partiya Yekitiya Demokrat  - PYD

 

* Komisyona Jin a KNK’ê

 

* Tevgera Goran

 

* Partiya Demokrasî û Wekhevîya Gelan - DEM Partî

 

* Partiya Herêmên Demokratîk  - DBP

 

* Rêxirawî Jinanî Zexmetkêşanî Kurdistan

 

* Hizbî Şûî

 

* Hizbî Sosyalîst

 

* PDS

 

* Lîderên Aştiyê

 

* Tevgera Jinên Êzdî  - TAJÊ

 

* Bûroya El Wahdê

 

* Komeley Afratanî Kurdistan

 

* Tevgera Jinên Kurd a Ewrûpa  - TJK-E

 

* Rêxirewî Peywendîyên Jinên Kurd - REPAK

 

* Şepêla Pêşeroja Kurdistan

 

* Partiya Yekitiya Demokrat a Kurd li Sûriyê

 

* Partiya mirov û Azadîyê - PÎA

 

* Komelgeha Jinên Azad ya Rojhilatê Kurdistan - KJAR