EDENE - Malbatên ku di şer de bi şewitandina gundên xwe neçar man koç bikin û xizmên wan hatine windakirin piştgirî dan banga dîrokî ya Rêberê Gelê Kurd Abdullah Ocalan û gotin ku dora gavavêtinê ya dewletê ye.
Piştgiriya ji bo ‘Banga Aştî û Civaka Demokratîk’ ku Rêberê Gelê Kurd Abdullah Ocalan di 27 'ê Sibatê de îlan kir, dewam dike. Malbatên ku di pevçûna 40 salî de gundên wan hatin şewitandin û berdêl dan jî işaret bi girîngiya bangawaziyê kirin û xwestin ku hikûmet ji bo çareserî û aştiyê gavan biavêje.
Malbata Oruç di sala 1993'an de ji ber ku mala wan a li gundê Alluzê ya navçeya Bismil a Amedê hat şewitandin neçar ma koçî Edeneyê bike. Zehra Orûç (Tamara Şîlan Sîpan) ku li dijî zilmê têkoşiya, sala 2016'an di dema qedexeya derketina derve ya li navçeya Sûr a Amedê de jiyana xwe ji dest da, lê cenazeyê wê nehat radestkirin. Dayik Bezo Orûç ku bi salan e ji bo cenazeyê keça xwe werbigire têdikoşe û dixwaze gora keça wê hebe.
Bezo Orûç diyar kir ku zilm û zordarî li wan tê kirin, lê tevî vê yekê jî dest ji têkoşîna xwe ya mafdar bernedan. Bezo Oruç ê piştgirî da banga Abdullah Ocalan wiha got: "Di vê têkoşînê de bi hezaran mirov hatin qetilkirin. Ji warên xwe hatin koçberkirin. Tevî vê yekê jî em aştiyê dixwazin, bila xwîn nerije."
'EM KEVIREKÎ GORÊ DIXWAZIN'
Di sala 1997'an de piştî ku gundê Mezra yê navçeya Elkê ya Şirnexê hat şewitandin Xeza Ozlu neçar ma koçî Edeneyê bike. Keça wê Sûltan Ozlu, di sala 1995'an de tevlî nava refên PKK'ê bû, di sala 2007'an de jiyana xwe ji dest da. Xeza Ozlu û zarokên wê bi salan rastî zext û îşkenceyên giran ên polîsan hatin. Xeza Ozlu ku 2 caran hat girtin û serbest hat berdan, li gel zextan jî gavekê jî ji têkoşîna xwe paşve neavêt.
Xeza Ozlu diyar kir ku ew aqûbeta cenazeyê keça xwe nizanin û wiha got: "Min gelek zilm, zordarî û îşkenceya dewletê dît. Her carê tên û pirsa keça min dikin. Em aştî û biratiyê dixwazin. Em naxwazin ti leşker, polîs û gerîla bimirin. Daxwaza me ji dayikên leşkeran; werin em destê xwe bidin hev û vê pirsgirêkê çareser bikin. Kevirekî gorê yê keça min jî tune ye. Rewşeke zehmet e. Keça min tê xewnên min. Ez dixwazim gora keça min hebe.”
'DIVÊ DEWLET GAV BIAVÊJE'
Hevserokê Komeleya Alîkarî û Piştevaniyê ya Bi Malbatên Xizmên Xwe Windakirine (AYKAY-DER) Mustafa Yildiz, diyar kir ku di têkoşîna azadiya Kurd de 2 birayên xwe winda kirine û gorên wan jî tune ne. Yildiz bibîr xist ku ew piştgiriyê didin banga Abdullah Ocalan û wiha got: "Em dixwazin dewlet di dema herî nêz de gavê biavêje. Em dixwazin xwîn raweste. Em naxwazin êdî ti leşker, polîs û gerîla jiyana xwe ji dest bidin. Em naxwazin dayik bigirîn. Rondikên dayikan yek in. Em dixwazin dayikên Tirk û Kurd destê xwe bidin hev û ji bo ev pêvajo bi ser bikeve çi ji destê wan tê bikin."
MA / Hamdullah Yagiz Kesen