NAVENDA NÛÇEYAN - Di pîrozbahiyên Newrozê yê li Erdîş, Panos û Gimgimê de xwedî li banga Rêberê Gelê Kurd Abdullah Ocalan hat derketin û banga gavavêtinê li dewletê hate kirin.
Li navçeya Erdîşê ya Wanê, Panos a Agiriyê û li navçeya Gimgimê ya Mûşê pîrozbahiyên Newrozê hatin lidarxistin.
WAN/ERDÎŞ
Pîrozbahiya Newrozê ya li navçeya Erdîşê ya Wanê li Qada Fenerê hat lidarxistin. Welatiyên ku di saetên serê sibehê de bi cil û bergên xwe yên reng bi reng berê xwe dan qada pîrozbahiyê, gelek caran dirûşma “Bijî Serok Apo” berz kirin. Pîrozbahî, bi rêzgirtinê dest pê kir. Piştre jî welatiyan li ber stranan govend gerandin. Hevserokên partiyên siyasî yên navçeyê û hevşaredarên navçeyê di pîrozbahiyê de axivîn û piştre jî agirê Newrozê hate vêxistin. Bi vêxistina agirê Newrozê re welatiyan dîsa govend gerand.
PIŞTGIRÎ DAN BANGÊ
Hevseroka DEM Partiyê ya Wanê Gulşen Kurt di pîrozbahiyê de wiha got: “Birêz Ocalan banga sedsalê kir. Têkoşîna gelê Kurd bi sala ye dide ne tenê ji bo me, ji bo azadiya tevahiya gelan e. Banga hatiye kirin ne tenê ji bo Kurdan, ji bo hemû gelan e. Heta ku aştî tê vî welatî dê têkoşîna me bidome. Em li vir careke din bang dikin; divê birêz Ocalan ji hêla fîzîkî ve azad bibe.”
Hevserokê DBP’ê yê Wanê Cema Demîr jî wiha got: “Têkoşîn û rêxistiniya me êdî derbasî qonaxeke nû bû. Peyama aştiyê ya birêz Ocalan, peyama aştî, azadî û demokrasiyê ye. Di tevahiya dîrokê de komkujî li Kurdan hate ferzkirin lê dîsa jî Kurdan destê aştiyê dirêj kir. Çi dibe bila bibe em ê bi vê banga aştiyê re bin û piştgiriyê bidin.”
‘MEŞALEYA AŞTIYÊ DI DESTÊ BIRÊZ OCALAN DE YE’
Hevşaredara Bajarê Mezin a Wanê Neslîhan Şedal jî wiha got: “Bi sala ye tevî hemû zextan jî gelê me serî netewand û berxwedana xwe domand. Em îro li qadên Newrozê bûn milyon kes. Newroz, aştî û hêvî ye. Agirê Newrozê ji bo jin, jiyan, azadî ye. Ji ber ku agirê Newrozê bi bedena Zekiye û Rahşanan geş bû. Meşaleya aştiyê niha di destên birêz Ocalan de bilind dibe. Em soz didin birêz Ocalan, em ê bi pêşengtiya jin û ciwanan vê banga we bi aştiyeke birûmet tacîdar bikin.”
‘DIVÊ DEWLET TAVILÊ GAVÊ BIAVÊJE’
Parlamenterê DEM Partiyê yê Wanê Sînan Çîftyurek jî ev tişt anî ziman: “Ji vir û şûnde divê dewlet bêyî hincetan nîşan bide, yekser gavan biavêje. Beriya peyama birêz Ocalan were weşandin, bi her kesî re hevdîtin hatin kirin û nêrînên wan jê hatin pirsîn. Di vê rewşê de rageşiya di navbera gelê Kurd û siyasetê de jî ji holê rabû. Gelê Kurd êdî yek e û bi hev re tevdigere. Ev peyam, di heman demê de ji bo yekitiya gelê Kurd e.”
Parlamentera DEM Partiyê ya Wanê Gulderen Varli jî wiha got: “Bila her kes dengê vî gelê bi sala ye li dijî zilmê li ber xwe dide bibihîse. Bi banga birêz Abdullah Ocalan re êdî dengê aştiyê careke din li ser vê xakê bilind dibe. Tevî ewqas êşên me kişandin jî li pêşiya me pêvajoyeke aştiyê ya nû heye. Divê her kes piştgiriyê bide.”
AGIRÎ/PANOS
Pîrozbahiya Newrozê ya li navçeya Panos a Agiriyê jî li Termînala Otogarê hat lidarxistin. Bi sedan kes tev li bûn. Pîrozbahî, bi rêzgirtinê dest pê kir. Di pîrozbahiyê de ji ewil Parlamentera DEM Partiyê ya Agiriyê Necla Demîr axivî û got: “Di vê 21’ê Adarê de em ê teqez xwe bighînin aştî û azadiyê. Em ê aştî û azadiyê ava bikin û bi ser kevin. Sala 2025’an dê bibe sala azadiyê ya gelê Kurd. Di 27’ê Sibatê de ji Îmraliyê ji bo hemû gelan peyama azadî û aştiyê hat dayin. Divê em xwedî li vê peyamê derkevin û li her qadê bidin jiyîn.”
‘BI DESTÊ HATIYE DIRÊJKIRIN BIGIRIN’
Parlamenterê DEM Partiyê yê Wanê Mahmût Dîndar jî wiha got: “Ev têkoşîn ji Mazlum Dogan heta Sema Yuceyan û roja me didome. Sala 2025’an dê bibe sala gelê Kurd. Dê bibe sala aştî û xwişk-biratiyê. Daxuyaniya birêz Abdullah Ocalan daxuyaniyeke dîrokî bû. Birêz Ocalan ji bo bidawîkirina şerê didome bang kir. Hewceye em jî li dijî vê bangê berpirsyartiyên xwe bicih bînin. Em li vir bangî dewletê dikin; êdî bes e ji zilm û îşkenceya bi salan didome re. Divê hûn bi destê aştiyê yê hatiye dirêjkirin bigirin.”
Piştî axaftinan, agirê Newrozê hat hilkirin. Welatiyên li qada pîrozbahiyê li ber stranan govend gerandin.
MÛŞ/GIMGIM
Yek ji navendên din ên Serhedê ku agirê Newrozê lê hate vêxistin jî navçeya Gimgimê ya Mûşê bû. Xelkê Gimgimê di saetên zû yên serê sibehê de herikî qada pîrozbahiyê. Qada Newrozê bi rojan berê bi alên DEM Partiyê hatibû xemilandin. Ji 7 salî heta 70 salî bi hezaran kes bi cil û bergên Kurdî, bi şal, puşî û flamayên kesk û ser û zer beşdarî pîrozbahiyê bûn. Di pîrozbahiyê de coşeke mezin hebû û welatiyan li ber stranên Kurdî govend gerandin. Heta ku bernameya Newrozê bi dawî bûyî jî girseyê dirûşmên “Bê Serok jiyan nabe” û “Jin, jiyan, azadî” berz kirin.
Hevşaredarên Gimgimê yên DEM Partiyî, Parlamentera DEM Partiyê ya Mûşê Sumeyye Boz û Parlamenterê Colemêrgê Onur Duşunmez, endam û rêveberên DEM Partî û DBP’ê yên bajar û navçeyan jî tev li pîrozbahiyê bûn. Bernameya Newrozê bi deqeyek rêzgirtinê dest pê kir. Piştre jî dirûşma ‘Şehîd namirin’ hate berzkirin. Di pîrozbahiyê de ji ewil hevserokên DEM Partiyê yên navçeyê axivîn û peyamên azadî û aştiyê dan.
NEWROZA XWEDÎDERKETINA LI BANGÊ
Parlamenter Sumeyye Boz diyar kir ku Newroza 2025’an ji hêla dîroka aştî û azadiyê ve xwedî wateyeke dîrokî ye û wiha got: “Bi pêvajoya ku birêz Abdullah Ocalan di 27’ê Sibatê de daye destpêkirin re em bêhtir nêzî aştî, azadî û civaka demokratîk in. Aştiyeke Ji bo aştiyeke birûmet a gelan û jiyaneke azad em ê li her qadê xwe bêhtir birêxistin bikin û têkoşîna xwe mezintir bikin. Bi têkoşîna bi pêşengtiya jinan re em ê azad bibin û aştiyê bînin.”
Parlamenter Onur Duşunmez jî ev tişt anî ziman: “Ev Newroz tê wateya azadiyê. Ji zindanan heta qadên têkoşînê, em ê her derê veguherînin qadên azadiyê. Heta ku birêz Ocalan azad nebe, heta mafê hêviyê neyê cîbicîkirin, heta li çiyayan gul venebin, heta kesên hatine sirgunkirin venegerin welatê xwe, heta civakeke demokratîk û aştî neyên avakirin em ê dev ji têkoşîna xwe bernedin. Ji bo vê jî divê gelê me li dora sekn û helwesta birêz Ocalan bicive. Me gelek êş kişandin lê êdî dê cihê wan êşan aştî, azadî û civaka demokratîk bigire. Ev bang; dê bi xwe re aştî û jiyaneke azad ji bo hemû mirovahiyê bîne.”
Piştî axaftinên hatin kirin, agirê Newrozê hate vêxistin. Bi sedan kesên li dora agir hatin gel hev, li ber stranên hunermendên herêmî govend gerandin û pîrozbahî bi dawî kirin.
COLEMÊRG/ÇELÊ
Pîrozbahiya Newrozê ya navçeya Çelê ya Colemêrgê li qada dawetan a Taxsaranê hat lidarxistin. Gelek kes tev li pîrozbahiyê bûn. Welatî bi cil û bergên xwe yên Kurdî beşdar bûn. Pîrozbahî, bi deqeyek rêzgirtinê dest pê kir. Piştre jî Hevserokên DEM Partiyê yên navçeyê Fahrettîn Dervîşoglû û Hîvîdar Ertunç gel silav kirin û Newroza wan pîroz kirin.
Hevserokê DEM Partiyê yê Colemêrgê Kadîr Şahîn di pîrozbahiyê de wiha got: “Tijekirina qadên Newrozê, piştgiriya bi bedelên hatine dayin re ye. Bi destê dewletê li vir polîtîkayeke qirêjî tê meşandin. Me ev yek di hilbijartinan de dît û niha jî dibînin. Lê çi bikin jî dê gelê Çelê bi polîtîkayên wan dizane û serî natewîne. Em di wê baweriyê de ne ku dê di pêvajoya aştiyê ya pêş de gelê me dê pozîsyoneke dîrokî bi dest bixe. Hezar silav ji birêz Abdullah Ocalan re ku bû wesîleya aştiyê û bang kir.”
Parlamentera DEM Partiyê ya Colemêrgê Oznûr Bartin jî anî ziman ku ew bi Newrozê banga dîrokî pêşwazî dikin û wiha got: “Banga dîrokî ya 27’ê Sibatê ya Rêberê Gelê Kurd Abdullah Ocalan li hemû cîhanê deng veda. Heke daxwaza aştiyê hebe, wê demê divê ev bang baş were nirxandin. Divê em vê banga birêz Ocalan ku manîfesto ye, divê em bixin meriyetê. Em di wê baweriyê de ne ku dê aştiyê bînin vî welatî. Dawiya her şerekî aştî ye. Em, banga birêz Ocalan hembêz dikin û dê li bajarê xwe birêxisti bikin. Berxwedana me ya ji bo aştiyê dê bidome.”
Piştî axaftinan, agirê Newrozê hate vêxistin. Welatiyên Çelê li dora agirê Newrozê govend gerand.