5’emîn Dadgeha Cezayên Giran a Amedê bi îdiaya “bi zanebûn û bi dilxwazî hewl da alîkariyê bide rêxistinê” 3 sal û 9 meh cezayê hefsê da Hevşaredarê Bajarê Mezin ê Wanê Abudllah Zeydan. Piştî vê biryarê, xelkê Wanê li pêşiya avahiya şaredariyê çalakiya nobetê da destpêkrin û çalakî di roja 3’yemîn de didome. Hevşaredarên Bajarê Mezin a Wanê Neslîha Şedal û Abdullah Zeydan jî tev li çalakiyê dibin. Hevşaredar Zeydan ku ev 2 şev in li gel ciwanan nobetê digire, pirsên Ajansa Mezopotamyayê (MA) bersivand. 

 

Zeydan, di serî de spasiya gelê Wanê kir ku xwedî li îradeya xwe derdikeve û seknekî raber dike û got: “Gel, bi awayekî heybet demokrasî, edalet û hiqûqê dipaêze. Ji 7 salî heta 70’ê salî gelê me li vir li gel îradeya xwe ye. Tevî temenê xwe yê mezin û hewayê sar jî ji bo demokrasî û îradeyê nobetê digirin. Ev yek pir tiştekî binirx e. Ev ne tenê xwedîdeketina li vîna gelê Wanê ye, her wiha tê wateya parastina vîna 85 milyon welatiyan. Divê gelê me bi tenê neyê hiştin. Me her tim got; îradeya her mirov û gelekî rûmet û heysiyeta wan e. Lewma jî parastina îradeyê tê wateya parastina demokrasiyê.” 

 

'HER KES BI SEKNA GELÊ WANÊ SERFIRAZ E’ 

 

Zeydan, bi domdarî ev tişt anî ziman: “Dibe ku niha hinek derdorên biçûk qedrê vê çalakiyê fêm neke lê dê di demên pêş de pir baş bê fêmkirin. Wê demê dê girîngiya keda li vir tê dayin baş bê fêmkirin. Dê bibînin ku bi saya vê têkoşînê hêviya demokrasiyê ya li Tirkiyeyê zindî ma ye. Bêguman avakirina jiyaneke birûmet, azad, demokratîk, wekhev û piranîparêz ewqas hêsan nîne. Ji bo parastina îrade û demokrasiyê carnan ked divê. Vaye gelê me vê kedê dide. Vê sekna gelê Wanê hêvî da her kesî. Her kes bi vê sekna birûmet serfiraz e.” 

 

'CIWAN BERPIRSYARTIYEKE MEZIN DIGIRIN SER XWE’ 

 

Bi domdarî Zeydan, bal kişand ser piştgiriya ciwanan û wiha got: “Ciwan, her tim bûne hêza sereke ya civakê û demokrasiyê. Ciwan, xwedî li îradeya xwe derdikevin. Ji bo pêşeroja xwe berpirsyartiyê li xwe digirin. Heke li cihekî xespkirina îradeyê hebe û edalet û demokrasî hatibe binpêkirin, li wê derê tu tiştek baş nameşe. Dê aborî xerab bibe û hêvî tune bibe. Lewma jî ciwan ji bo zindîhiştina hêviyê xwe berpirsyar dibînin. Di demeke ku îxtîmala aştiyê mezin dibe de divê her kes bêhtir xwedî li demokrasiyê derkeve. Di serdemeke wiha de ciwan û jin xwe bêhtir berpirsyar dibînin. Heke bi rastî jî aştiyeke mayinde û civakî bixwazin, divê weke şertê ewil îradeya gel binpê nekin. Heke hûn ji gelekî re bibêjin ‘ez îradeya te nas nakim’, ev tê wê wateyê ku tu Kurdan weke mirov nabînî. Ciwan, vê nêzikatiya rûmetê binpê dike qebûl nakin.” 

 

'TAYÎNKIRINA QEYÛM BINPÊKIRINA RÛMETA GEL E’ 

 

Zeydan, got ku bi tayînkirina qeyûm re îktîdar bi rûmeta mirovan dilîze û wiha derbirî: “Bi tayînkirina qeyûman, bi girtina hevserokên me yên giştî û wekîlan ev tişt kirin. Lê gelê me her carê xespa qeyûman red kir û li ser sindoqê ev yek nîşan da. Lê dîsa jî hikûmet israr dike. Dîrokê jî nîşan daye ku her tim kesên aştiya civakî, edalet, hiqûq û edalet esas girtin bi ser ketine. Gelê me yê îro îradeya xwe û demokrasiyê diparêze dê teqez bi ser keve.” 

 

'EW Ê BI ŞERMEKÎ MEZIN RE RÛ BI RÛ BIMÎNIN’ 

 

Zeydan, bi lêv kir ku dema Tirkiye asayî bû dê kesên bi sepanên dijdemokratîk vîna gel xespkirin û her tişt pêşkeşî alîgirên xwe kirin bi şermekî mezin re rû bi rû bimînin. Zeydan, axaftina xwe wiha qedand: “Lê kesên îro demokrasî û vîna gel diparêzin dê bi serfirazî bên bibîranîn. Heke we mafê bijartin û hilbijartinê yê gelekî ji dest girt, wê demê hûn her tiştekî jê distînin. Gelê me her tim li dijî vê derket û red kir. Ew zîhniyeta ku dixwaze çavkaniyên şaredariyê pêşkeşî alîgirên xwe bike, naxwaze vê rastiyê bibîne. Çavên wan tarî bûne. Komeke biçûk a ku girtin, binçavkirin, birçîbûna gel ne bi xema wan lê tenê di nava xirecira ‘ez ê pereyan pêşkeşî alîgirên xwe bikim’ de, heye. Di vir de ya girîng ew e ku kesên xwedî wijdan û edalet ji bo pêşeroja Tirkiyeyê û jiyaneke birûmet û azad rê nedin vê koma biçûk. Ciwan û jin bi vê hesasetiyê xwedî li îradeya xwe derdikevin.” 

 

MA / Adnan Bîlen - Mehmet Guleş