AMED - Nûnerên saziyên ku kampanyaya "Ji Rojava re statu, ji gelan re azadî" îmze kirin, bal kişandin ser gengeşeyên li ser pirsgirêka kurd û gotin: "Gava li hundir doza aştiyê bê kirin, divê li derve komkujî neyên kirin."
419 partî, sazî û rêxistinan di 26'ê Çileyê de li Amedê li hev civiyan û kampanyaya "Ji Rojava re statu, ji gelan re azadî" îmze kirin û ji raya giştî re ragihandin. Di daxuyaniya saziyan de banga naskirina statuya Bakur û Rojhilatê Sûriyeyê ya ku di hedefa êrişan de ye hat kirin. Nûnerên saziyên îmze dan kampanyayê, êrişên li Bakur û Rojhilatê Sûriyeyê nirxandin.
Endamê Desteya Rêveber a Komeleya Hiqûqnasên Ji Bo Azadiyê (OHD) Yakûp Demîr diyar kir ku nêzî 13 sal in li Bakur û Rojhilatê Sûriyeyê atmosfera aştiyê pêk tê û ji bo vê jî divê statuyeke navneteweyî bê dayîn. Demîr diyar kir ku armanca bingehîn a kampanyayê ew e ku bi vê naskirinê êrişên komên cuda bi dawî bibe û got: "Em bang li hemû saziyên ku piştgiriyê didin aştî û biratiyê statuya Rojava nas bikin û piştgiriyê bidin gelên li wir."
Demîr bal kişand ser muzakereyên bi Rêberê PKK'ê Abdullah Ocalan re û diyar kir ku şer û pevçûnên li Bakur û Rojhilatê Sûriyeyê zirarê dide vê pêvajoyê. Demîr diyar kir ku wekî her carê pevçûn û pêvajoya di nava hev de derbas dibin û got: "Em wekî rêxistinên mafên mirovan û saziyên sivîl, ji bo jiholêrakirina van pevçûnan bi hemû hêza xwe hewl bidin."
Endama Komîsyona Rêxistinê ya Federasyona Komeleyên Hiqûq û Piştevaniyê ya Malbatên Girtî û Hikumxwaran a Medê (MED TUHAD-FED) Emîne Kayayê jî diyar kir ku bi hilweşandina rejîma Baasê re elewî, X-xiristiyan û kesên ji ol û baweriyên din bûne qurbanî li Sûriyeyê. Emîne Kayayê diyar kir ku bi dayîna statuyê ji Bakur û Rojhilatê Sûriyeyê re wê pêşî li êrişên li ser Bakur û Rojhilatê Sûriyeyê ku gel û bawerî bi hev re dijîn, bê girtin. Emîne Kayayê anî ziman ku bi deklerasyona ku weşandine dixwazin li dijî êrişên li Rojavayê bibin deng.
Emîne Kayayê destnîşan kir ku di pêvajoyeke ku muzakereyên çareseriya pirsgirêka kurd didomin de êrişên li ser Bakur û Rojhilatê Sûriyeyê nayên qebûlkirin û got: "Divê Tirkiye di demeke herî kurt de vê şaşitiyê ji holê rake."
Hevserokê Komeleya 78'an Ahmet Candan jî diyar kir ku ji Şerê Cîhanê yê Yekemîn û vir ve li erdnîgariya kurdan komkujî berdewam dikin. Candan diyar kir ku bi êrişên li ser Bakur û Rojhilatê Sûriyeyê tovên nefretê di nava gelan de hatine çandin û got: "Êriş û aştî bi hev re nabin. Eger ev gel dixwazin wekhev bijîn, divê dawî li şer bê û polîtîkayên aştiyê werin meşandin."
MA / Mujdat Can - Şirvan Şîlan Çîl