Hevşaredarên Akdenîz a Mêrsînê Hoşyar Sariyildiz û Nûriye Arslan di 10’ê Çileyê de hatin binçavkirin, di 13’ê Çileyê de hatin girtin û li şûna wan qeyûm hate tayînkirin. Parlamenterê DEM Partiyê yê Mêrsînê Alî Bozan diyar kir ku ji ber çavkaniyên aboriyê yên Akdenîzê, îktîdar weke qadeke rantê dibîne û bi vê mebestê qeyûm lê tayîn kiriye. 

 

Alî Bozan, da zanîn ku Şaredariya Akdenîzê ji hêla aborî ve li Mêrsînê yek ji şaredariyên herî sereke ye û ev tişt anî ziman: “Îktîdar vê derê weke qadekî rantê ya mezin dibîne. Dixwaze pêşkeşî çeteyên li cem xwe bike. Di 29’ê Tîrmeha 2022’yan de pêşnûmeyek pêşkeşî şaredarê Akdenîzê hate kirin. Di pêşnûmeyê de dihat xwestin ku şaredar bikare 50 milyon lîreyan deyn bike, neguhêzbaran bifiroşe, rayeya kirêkirinê û Parka Yilmaz Guney veguherîna wargehê dida. Lê hejmara AKP’iyan a di meclisê de kêm bû lê nekarin derbas bikin. Piştre xwestin civîneke awarte li dar bixin û dîsa vê mijarê nîqaş bikin. Beriya civînê, 5 endamên meclisê yên HDP’î hatin binçavkirin û bi vê yekê re piraniya meclisê kete destê AKP’ê. Biryar, bêyî endamên HDP’î hate dayin. Wê demê Midûriyeta Emniyetê, serdozgerriya Komarê û Şaredarê Akdenîzê yê AKP’î mîna çeteyan kompas kiribûn.” 

 

Parlamenterê DEM Partiyê Alî Bozan

 

'JI BILÎ KURDAN JI BO HER KESÎ DEMOKRASÎ’ 

 

Bozan, got ku Şaredariya Akdenîzê demekî dirêj e hedef tê nîşandan û ev tişt anî ziman: “Medyaya hewzê û ak trolan şaredarî hedef nîşan didan û digotin divê qeyûm lê were tayînkirin. Ji bo vê derheqê hevşaredarên me de nûçeyên derew parve dikirin. Hevşaredarên me bêyî cihêkariyê bikin xizmet dikirin. Lê niha xizmetê nakin, endamên meclisa şaredariyê nikarin bikevin hundir, dema xebatkar dikevin hundir ser wan digerin, hinek xebatkar derxistina betlaneya bi darê zorê. Navê vê dagirkerî û xesp e. Qeyûm tê wateya ‘Ji bilî Kurdan ji bo her kesî demokrasî.’” 

 

'GIRTINA HEVŞAREDARAN FIHÊTÎ YE’

 

Bozan, bal kişand ser hevdîtinên dawî yên bi Rêberê PKK’ê Abdullah Ocalan re û got: “Ev yek nîşan dide ku Erdogan û Bahçelî jidil nînin.” Bozan, da zanîn ku di dosyayên hevşaredaran de tu delîl nînin û ji bo girtina hevşaredaran got: “Girtina hevşaredaran fihêtî ye.” Bozan, da zanîn ku îdiaya “li ser fermana rêxistinê kes girtine kar” jî rast nîne û wezaretê serlêdana şaredariyê ya ji bo wergirtina karkeran qebûl nekiriye. Bozan, got: “Ev yek nîşan dide ku şahidên nepen ji ber xwe ve çêkirine. Li qeydên HTS’ê nihêrtine û nehatiye gotin bê bi kê re çi axivî ne. Tu bingeheke wan a hiqûqî nîne. Xuyaye ku meseleya esasî xespkirina îradeyê û ranta li Akdenîzê ye.” 

 

'ÇI KARÊ AKP’IYAN LI ŞAREDARIYÊ HEYE?’

 

Bozan, diyar kir ku dema hevşaredar hatin binçavkirin polîsan destûr nedane tu kes bikeve şaredariyê û wiha pê de çû: “Tenê AKP’î girtin hundir. Dema hevşaredar binçavkirî çi karê wan AKP’iyan li şaredariyê hebû? Dema hevşaredar hatin girtin jî tenê AKP’î girtin hundir. Kesên weke hilbijêrên xeyalî hatibûn teşhîrkirin, dîsa li şaredariyê weke midûr hatin peywirdarkirin. Van midûran rant pêşkeşî alîgirên xwe dikirin û qeyûm dîsa ew girtin kar.” 

 

'GEL ÇI XWESTIBE DÊ EW BIBE’

 

Bozan, axaftina xwe wiha qedand: “Gel, di 31’ê Adarê de got ‘em dixwazin DEM Partî şaredariya me birêve bibe.’ Gel çi xwestibe dê ew bibe. Ji bo îradeya di 31’ê Adarê de derketî holê bidome em tevî gelê xwe têdikoşin. Em ê kolanan bernedin. Gel li dijî îktîdarê bibertek e. Li rexekî destê xwe dirêj dikin li rexa din xespa qeyûm dikin. Li rexekî destê xwe dirêjî Kurdan dikin li rexa din li Rojava sivîl tên qetilkirin, cenazeyên rojnameger Nazim Daştan û Cîhan Bîlgîn nedan. Gelê Kurd vê qebûl nake. Dê berxwedana gelê me bidome.” 

 

MA / Emrullah Acar