Parlamenterên Partiya Wekhevî û Demokrasiyê ya Gelan (DEM Partî) Sirri Sureyya Onder û Pervîn Bûldan piştî ku di 28’ê Kanûnê de li Girtîgeha Îmraliyê bi Rêberê PKK’ê Abdullah Ocalan re hevdîtin pêk anîn, peyamek ji 7 xalan pêkhatî belav kirin. Di peyamê de ku nêrîn û nirxandinên Rêberê PKK'Ê Abdullah Ocalan tê de wiha hat gotin: "Bûyerên li Xeze û Sûriyeyê nîşan didin ku çareseriya vê pirsgirêkê ya ku bi destwerdanên derve hewl tê dayîn bê lareşîkirin, nayê taloqkirin. Ji bo ev yek bi awayekî cidî bi ser bikeve divê muxalefet jî tevkariyê lê bike û pêşniyazan bike. Ev hewldana me hemû, wê welat bigihîne asta ku heq dike û her wiha wê ji bo veguherîneke demokratîk jî bibe rêbereke pir girîng. Dem dema ji bo Tirkiye û herêmê dema aştî, demokrasî û biratiyê ye."

 

 

Ahmet Yaman ku di dema komploya navneteweyî de li Îtalyayê bi Abdullah Ocalan re ma û niha jî Berdevkê Karên Derve yê Meclisa Kurd a Swîsreyê ye, peyama Îmraliyê ya ji 7 xalan pêkhatî nirxand. Yaman bal kişand ser balkişandina li ser peyama "ji nû ve xurtkirina biratiya tirk-kurda' û got: "Nêzîkatiya erênî ya birêz Ocalan a ji bo aramkirina têkiliyên kurdan û Tirkiyeyê yên li ser bingehê demokratîk ne nû ye. Nêzîkatiya xwe esas girtiye. Di vê xalê de bi salan e ku aştiya civakî armanc dike, gelek pêşniyazên çareseriyê hatine pêşniyazkirin. Biratiya gelan êdî li hemberî êşên gelan kişandine girîng e. Di vê çarçoveyê de bi baweriya min birêz Ocalan nêzîkatiyeke rast nîşan daye."

 

'ÇARESERÎ DÊ ROJHILATA NAVÎN DEMOKRATÎK BIKE'

 

Yaman diyar kir ku geşedanên li Rojhilata Navîn bi Tirkiyeyê ve jî girêdayî ne û got: "Bêguman ronîkirina vî şerî û aloziya ku li Tirkiyeyê geş dibe bi bandor e. Ji krîza aboriyê ya li welêt heta pevçûnan, bandora xwe li ser dewam dike. Pêşveçûnên li Rojhilata Navînê pir giran in. Kurd, tirk, ereb û faris gelên bingehîn ên Rojhilata Navîn in. Çareseriya pirsgirêka kurd di rastiyê de tê wateya demokratîkbûna tevahiya Rojhilata Navînê. Ger aştiya civakî pêk neyê eşkere ye ku dê felaketan bi xwe re bîne."

 

Yaman bal kişand ser peyama Abdullah Ocalan û got ku divê vê niyeta baş bê nirxandin û qethiyen neyê paşguhkirin. Yaman destnîşan kir ku "paradîgmaya nû" aştiya kurd-tirkan e. 

 

Yaman da xuyakirin ku bêyî çareseriya pirsgirêka kurd Tirkiye demokratîk nabe û got: "Divê civaka kurd û tirk êdî vê wekî firsendeke mezin bibînin." 

 

'DIVÊ HEMÛ GEL XWEDÎ LÊ DERKEVIN'

 

Yaman nêzîkatiyên partiyên muxalefetê yên li hemberî pêvajoyê jî nirxandin. Yaman diyar kir ku CHP'ê pêvajoyê di çarçoveyeke teng de bi rê ve dinirxîne û tiştên ku diqewimin weke "stratejiya hilbijartinê" fêm kiriye. Yaman got: "Nêzîkatiya CHP'ê ya li pêvajoyê hinekî balkêş e. Ji bo Erdogan careke din di hilbijartinan de bibe serokomar, vê pêvajoyê wekî pêvajoyeke bi vî rengî hatiye destpêkirin dibîne. Eger wisa bûya, heyeta DEM Partiyê nediçû û bi CHP'ê re hevdîtinan nedikir. Bi rastî şertên bi vî rengî tune ye." 

 

Yaman da zanîn ku divê hemû gel û bawerî tev li pêvajoyê bibin û wiha dewam kir: "Birêz Ocalan bi qasî ku qîmetê dide civaka kurd, ew qasî jî dide civaka tirk û bawerî û mezhebin din jî. Ez yek ji wan şahida me ku bê di her firsendî de çi qasî doza aştiyê dike. Lewma divê hemû gel xwedî li vê paradîgmaya nû derkevin. Divê ev pêvajo bi ser bikeve. Vê carê pêvajo pir cuda ye. Êdîcivak nikarin deyax bikin. Ez bang li he rkesî dikim ku xwedî li Serok Apo derkevin û pê bawer in. Di vî warî de baweriya me ya ji bo birêz Ocalan tam e, em pê bawer in." 

 

MA / Ferhat Sezgîn