Partiya Herêmên Demokratîk (DBP) dê di 12’ê Çileyê de li Enqereyê 7’emîn Kongreya Asayî li dar bixe. Beriya kongreyê, li Amedê bi gel re civîn hat lidarxistin. Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari axivî. 

 

Tulay Hatîmogûllari, di destpêkê de Sakîne Cansiz, Fîdan Dogan, Leyla Şaylemez, Sêve Demîr, Pakîze Nayir û Fatma Uyar ên di meha Çileyê de hatin qetilkirin bi bîr anî û wiha got: “Jinên Kurd her tim bûn hedefa rejîma faşîst a dewleta otorîter. Lê dîsa jî jinên Kurd nesekinin û tevî tevgera jinên Tirkyeyê têkoşîneke mezin meşand. Bi saya têkoşîna xwe dirûşma ‘jin, jiyan, azadî’ li hemû cîhanê belav kir. Me her tim li dijî suîqest, cînayetên li dijî jinan têkoşîn kir. Heta ku jin li hemû cîhanê azad dibin jî dê ev têkoşîn bidome.” 

 

BERTEK NÎŞANÎ BIRYARA TÊKILDARÎ TAHIR ELÇÎ DA

 

Tulay Hatîmogûllari, bertek nîşanî erêkirina biryara beraetê ya di doza Tahir Elçî de ji bo polîsan hatiye dayin da û got: “Hêja Tahir Elçî li ber kamerayan hate qetilkirin. Di dozê de biryar hate dayin lê tu hukmê vê biryarê ji bo me nîne. Em ê bi tu awayî wan biryarên derheqê wan kujeran de qebûl nekin. Di şexsê hêja Tahir Elçî de em hemû rêhevalên xwe yên di têkoşîna aştiyê de jiyana xwe ji dest dayin bi rêzdarî bîr tînin.” 

 

‘KOBANÊ NEKET Û DÊ NEKEVE’

 

Hatîmogûllari, bal kişand ser geşedanên li Sûriyeyê û ev tişt anî ziman: “Ev geşedan bandorê li hemû cîhanê dikin. Piştî guherîna rejîmê tu demokrasî nehat wê derê. Li dijî xaka Rojava bi destê çeteyên SMO’yê ku Tirkiye xwedî dike, êriş tên kirin. Kesên digotin ‘Kobanê ket, dikeve’ dîsa ji bo ketina Kobanê her tiştî dikin. Lê Kobanê neket û dê nekeve. Bila ev bo wan bibe ders. 

 

RÊVEBERIYA XWESER MODÊL E 

 

Her wiha li dijî Elewî, Xiristiyan û Durziyan jî komkujiyên mezin tên kirin. Em bangî hemû hêzên navneteweyî û demokrasiyê dikin; ji bo pêşîlêgirtina komkujiyan tavilê bikevin nava tevgerê. Ji bo statûya Rojava fermî bibe divê em bêhtir têbikoşin. Em dizanin ku li Sûriyeyê tekane çareserî ew e ku rêveberiyeke demokratîk a di serî de Kurdan, hemû gel û baweriyan digire nav xwe pêkan e. Modêla Rojava ketiye meriyetê û ji Rojhilata Navîn û cîhanê re bûye mînak. Divê ew esas were girtin. Divê bikeve meriyetê û fermî bibe. Ev geşedan, bandorê li her çar parçeyên Kurdistanê jî dikin. Em bang li her çar dewletan dikin; heta ku hûn demokratîk nebin dê nekarin ji lîstikên emperyalîzmê xelas bibin. Lewma divê li Iraq, Îran, Sûriye û Tirkiyeyê pirsgirêka Kurd bi rêyên demokratîk çareser bibe. 

 

DIVÊ DERIYÊN ÎMRALIYÊ BÊN VEKIRIN

 

Şandeya DEM Partiyê li Îmraliyê serdana birêz Ocalan kir. Dixwazim du xalên birêz Ocalan ji şandeya me re gotiye bi we re parve bikim. Birêz Ocalan dibêje; ‘Divê her kes geşedanên li Sûriyeyê û Xezeyê ji nêz ve bişopîne. Dema em li lîstikên hêzên emperyal dixwazin li herêmê bilîzin dinihêrin; dixwazin bakurê Kurdistanê jî veguherîna Xezeyê. Lewma divê pirsgirêka Kurd were çareserkirin. Lewma divê aştiyeke birûmet ava bike.’ Em jî bi van gotinan re ne. Tiştekî din jî ragihand. Got; ‘Ez silav û hezkirinên xwe ji gelê me yê birûmet ên qet dev ji têkoşînê bernedayî û bûn wesîleya vekirina deriyên Îmraliyê re dişînim.’ Gelê Kurd zêdetirî 40 sal in li her çar parçeyên Kurdistanê li dijî êrişan têdikoşe û têkoşîna xwe mezin dike. Heke Rêveberiya Xweser li Rojava hatibe vê astê, ev serkeftineke mezin a gelê Kurd e. Em di qonaxa şikestineke dîrokî de ne. An em ê bi erênî ji vê şikestina dîrokî derkevin û aştiyê ava bikin an jî dê her der veguherin Xezeyê. Lewma em bangî aqilê dewletê dikin; ev hevdîtina li Îmraliyê bi tena serê xwe têr nake, deriyên Îmraliyê vekin, zemîna şert û mercên fîzîkî ku birêz Ocalan bikare ji bo aştiya Tirkiye û Rojhilata Navîn bixebite ava bikin. Li dilê Kurdistanê Amedê ku nûnertiya îradeya gel dike, em bi hev re silav û hurmetên xwe ji Îmraliyê re dişînin.”