Enadma Meclisa Partiyê (PM) ya Partiya Herêmên Demokratîk (DBP) Sêvê Demîr, aktîvîsta Kongreya Jinên Azad (KJA) Fatma Uyar û Hevseroka Meclisa Gel a Silopiyayê Pakîze Nayir di 4’ê Çileya 2016’an de ji hêla segvanên di wesayîta zirxî de hedef hatin girtin û hatin qetilkirin. Bi ser mirina her sê jinan re ku di dema qedexeya derketina kolanan a di sala 2015-2016’an a li Silopiyayê de xwestin derbasî Taxa Karşiyakayê ya di dorpêçê de bibin û alîkariyê bidin gel re 9 sal derbas bûn. Di rapora otopsiyê ya Fatma Uyar de 3, di ya Pakîze Nayirê de 5 û di ya Sêvê Demîr de jî 11 gule hatin tespîtkirin. Di êrişê de yekser serê Sêvê Demîr hedef hatibû girtin û hatibû qetilkirin. Xizmên Sêvê Demîrê ew ji pora wê nas kirin û teşhîs kirin. 

 

Derheqê qetilkirina her sê jinan de qaşo lêpirsîn hate destpêkirin û Serdozgeriya Komarê ya Şirnexê biryara “bêrayetiyê” da û ji Serdozgeriya Komarê ya Silopiyayê re şand. Dadgehê jî ji bo qetilkirina her sê jinan got “li ser gumanê” çêbûye û dosya girt. 

 

ZEX, KOÇBERÎ Û GIRTÎGEH

 

Sêvê Demîr di 38 saliya xwe de hate qetilkirin. Hêj di temenekî biçûk de polîtîkayên zext û pişaftinê nas kir. Di sala 1977’an de li gundê Şûtê yê navçeya Stewrê ya Mêrdînê ji dayik bû û hêj 5 salî bû ku ji ber zextên dewletê tevî malbata xwe koçî navçeya Bismilê ya Mêrdînê bûn. Malbata Demîr 5 salan li Bismilê jiya û di sala 1995’an de koçî navçeya Salîhlî ya Manîsayê bû. Sêvê Demîr, li vir xwe di bin sîwana Partiya Demokrasiyê ya Gel (HADEP) de birêxistin kir, di rêveberiyê de cih girt û demekî dirêj di Baskê Jinan a HADEP’ê de xebitî. 

 

Sêvê Demîr, di salên pêş de di nava têkoşînê de bêhtir çalak bû û xebatên xwe di nava Komîsyona Jinan a Kongreya Civaka Demokratîk (KCD) de domand û li Amedê bicih bû. Sêvê Demîr ku xebatên xwe yên li herêmê didomand, hema hema li temamiya bajar û gundên herêmê geriya, li cihên diçûyê li jinan guhdarî kir û girîngiya têkoşîna li dijî serdestiya zilaman vegot. Di 18’ê Nîsana 2009’an di çarçoveya operasyona di bin navê “KCK’ê” de hate binçavkirin û girtin. 5 salan di girtîgehê de ma û piştre tehliye bû. Di sala 2011’an de beşdarî çalakiya greva birçîbûnê ya bêdem-bêdorveger a bi daxwaza rakirina tecrîda li ser Rêberê PKK’ê Abdullah Ocalan bû. Piştî ji girtîgehê derketî, tev li Meclisa Partiyê (PM) a Partiya Herêmên Demokratîk (DBP) bû. Xebatên xwe li Mêrdîn û Şirnexê domand. 

 

‘JI BO AZADIYÊ TÊKOŞIYA’

 

Dayika Sêvê Demîr, Sakîne Demîr anî ziman ku ew hesreta xwe ya ji bo keça xwe bi têkoşîna wê derbas dike. Sakîne Demîr, wiha got: “Bi dehan jin niha têkoşîna keça min didomînin. Dilê Sêvê berfireh bû, keseka dirûst û zîrek bû. Di xebatên xwe de serkeftî bû û jineke pêşeng bû. Ji zimanê xwe, çand û xaka xwe hez dikir. Ji bo azadiya her çar parçeyên Kurdistanê têkoşiya. Xebatkara gelê xwe bû. Bi hezaran jinên pêşengtiya têkoşîna azadiyê dikirin hatin qetilkirin. Em dayik, li pişt têkoşîna zarokên xwe ne. Bi keça xwe serbilind û serfiraz im. Heta ku ez sax bin dê li pey doza keça xwe bim. Ji ber ku keça min ji bo dozeke rewa têkoşiya lewma hate qetilkirin.” 

 

MÎRATEYA TÊKOŞÎNÊ YA KEÇA XWE DEWR GIRT 

 

Sakîne Demîr, anî ziman ku keça wê di temenekî ciwan de têkoşîn nas kiriye û wiha domand: “Bandoreke mezin li ser malbatê û gel kir. Di her bihosteke Ege û Kurdistanê de keda wê heye. Biçûya ku derê ew der birêxistin dikir, zanîna wan pêş dixist û ked dida. Heke ez bikarim îro wiha biaxivim, ev bi saya wê ye. Min hêza xwe ji keça xwe girt. Bi windakirina wê re dê bibêjî qey min hemû ji winda kirine. Lê min dît ku bi hezaran jinên mîna wê hene. Belê raste ez bêriya keça xwe dikim, bi hesreta wê dijîm. Lê bi hezaran jinên wekî wê hene û ez hesreta xwe bi wan derbas dikim.” 

 

JINÊN PÊŞENG HEDEF TÊN GIRTIN

 

Bi domdarî Sakîne Demîr destnîşan kir ku jinên pêşeng û şoreşger her tim hedef tên girtin û wiha dirêjî da axaftina xwe: “Di êrişên ser Rojava de jî sê jinên pêşeng û şoreşger hatin qetilkirin. Ji ber Tirkiye ji jinên şoreşger ewqas ditirse ku wan hedef digire. Ew jî dizanin ku têkoşînên jin pêşengtiya wan dikin dê bi ser kevin. Lê belê jinên ji bo xak û azadiya xwe têdikoşin dê bi ser kevin.” 

 

'XEYALÊN WÊ LI ROJAVA DIJÎN’ 

 

Di berdewamê de Sakîne Demîr bi lêv kir ku têkoşîna keça wê li her çar parçeyên Kurdistanê didome û wiha got: “Keça min nemir, xeyalên wê, têkoşîna wê di şoreşa jinê ya Rojava de dijîn. Sêvê, di hiş, aqil, hizra jinên Kurd de di têkoşîna û pêşeroja wan de cih digire. Bi hezaran jinan têkoşîna wê dewr girtin. Bila gelê Kurd vê baş bibîne, serkeftin dê ya me be. Hema bes em yekitiya xwe ava bikin û têbikoşin bes e. Erdogan, ji bo tunekirina Kurdan hemû cureyên taktîkên şer bi kar tîne. Lê nekarî tune bike û gelê Kurd hêj bihêztir bû. Bi qetilkirinê dê nekarin Kurdan tune bikkin. Erdogan li rexekî ji gelê Kurd re dibêje ‘birayên min’ û li rexa din jî Kurdên li Rojava qetil dike. Lê çi bikin jî gelê Kurd êdî zane bûye û ji bo mafê xwe têdikoşe. Banga min ji bo gelê Kurd e; me di vê têkoşînê de gelek zarokên xwe winda kir, divê em bibin yek. Têkoşîna zarokên me hêj xurtir bû û êdî hemû dinya nas dike.” 

 

BAVÊ WÊ LI SER KEÇA XWE STRAN GOT

 

 

Bav Azîz Demîr jî hesreta keça xwe bi stranekê anî ziman. 

 

Fadîle Gokturk a ku Sêvê Demîr di nava xebatên jinan de nas kir û bi hev re 15 salan têkoşiyan jî wiha got: “Sêvê, ji ewil di rêveberiya navçeyê de cih girt. Potansiyeleke wê ya têkoşînê hebû û her tim xwe perwerde dikir. Ji hêla nasnameya zayendê ve xwe baş pêş xist. Yek ji taybetiyên wê yên berçav jî her tim xwe nû dikir. Keseka pir fedekar bû. Aliyên feodal û qedexeyên civakî tune kiribû. Xwe, bi zanetiya jina azad afirandibû. Di ferqa vê tiştê de nînin; Sêvêyek diçe lê bi hezaran tên. Mîrateya wan li pey xwe hiştî di têkoşîna her jinê de dijî û dê her bijî. Bi hezaran jinan dan ser rêya wan jinên hatine qetilkirin, rabûn ser pêyan û dê her tim rabin ser pêyan.” 

 

MA / Semra Turan