AGIRÎ - Welatiyên beşdarî kongreya DEM Partiyê ya Bazîdê bûn diyar kirin ku ew hevdîtina parlamenterên DEM Partiyê ya bi Abdullah Ocalan re girîng dibînin û gotin: “Êdî dema azadiya Abdullah Ocalan hatiye.”
Wezareta Dadê ya dewleta tirk destûr da û parlamenterên Partiya Wekhevî û Demokrasiyê ya Gelan (DEM Partî) Sirri Sureyya Onder û Pervîn Buldan duh li Girtîgeha Îmraliyê bi Rêberê PKK’ê Abdullah Ocalan re hevdîtin kirin.
Welatiyên duh beşdarî 2’yemîn Kongreya Asayî ya DEM Partiyê ya Bazîd a Agiriyê bûn, têkildarî hevdîtinê û tecrîda heyî axivîn.
‘ÇARESERÎ BI AZADIYA OCALAN PÊKAN E’
Ji welatiyan Cemîl Koç, diyar kir ku pirsgirêka Kurd bandorê li tevahiya herêmê dike û wiha got: “Divê ev pirsgirêk êdî çareser bibe. Ev pirsgirêk, bi yek hevdîtina bi birêz Ocalan re çareser nabe. Ji bo vê divê birêz Ocalan azad bibe û ji bo çareseriyê şert û merc bên amadekirin. Heke wiha bibe, dikare di demekî kin de çareser bike. Heke fikrên birêz Ocalan bikevin meriyetê, şer û krîza li Rojhilata Navîn dikare bê çareserkirin. Nexwe dê şer û krîz her bidomin.”
Îlhan Tan jî diyar kir ku fikrên Abdullah Ocalan li hemû cîhanê belav bûne û divê Tirkiye vê bibîne. Tan, wiha domand: “Çareseriya li Rojhilata Navîn, bi paradîgmaya birêz Ocalan dibe. Lewma divê birêz Ocalan ji hêla fîzîkî ve azad be. Felsefeya birêz Ocalan a 'Jin, jiyan, azadî' li hemû cîhanê belav bûye. Kesên 40 sal berê komunîzm û Lenînîzm diparastin îro paradîgmaya birêz Ocalan diparêzin. Paradîgmaya birêz Ocalan îro li Rojava ketiye meriyetê. Kurdên li her çar parçeyan divê xwedî li destkeftiyên li Rojava derkevin. Divê ji bo birêz Ocalan şert û mercên guncav bên afirandin ku bikare bi gel re tevbigere, diyalogê pêş bixe û çareseriyê pêk bîne. Kesekî di tecrîdê ma dê çiqas bikare pêvajoyê bimeşîne? Lewma divê tecrîd tavilê rabe û birêz Ocalan ji hêla fîzîkî ve azad bibe. Gel qedir dide fikrên birêz Ocalan. Heke şert amade bin, dê ji bo gelên Rojhilata Navîn tiştên baş bibin.”
‘FELSEFEYEKE CIVAKPARÊZ E’
Ahmet Temtek jî bi lêv kir ku ji bo çareseriyê dive tecrîd bi temamî rabe û wiha got: “Felsefeya Abdullah Ocalan ji bo çareseriya Rojhilata Navîn girîng e. Temamiya Rojhilata Navîn ev felsefe pejirandiye. Divê Tirkiye êdî vê bibîne. Felsefeya Abdullah Ocalan ne mîna yên din olperst û yekperest e. Tevahiya civakê digire nav xwe. Çareserî, felsefeya Ocalan e.”
‘DIVÊ HEVDÎTIN ZÊDE BIBIN’
Bedevî Çelîk jî wiha got: “Bila êdî dayik negirîn, aştî û biratî çê bibe û girtî azad bibin.” Haci Îbrahîm Samur jî got: “Bila pirsgirêka Kurd çareser bibe û Rêberê Gelê Kurd birêz Ocalan azad bibe. Hevdîtina bi birêz Ocalan re girîng e. Lê çareserî tenê bi yek hevdîtinê nabe. Bila her tim hevdîtin bên kirin, li Meclisê biaxive û azad bibe.”
MA / Mehmet Guleş