NAVENDA NÛÇEYAN – Li gelek bajaran çalakî hatin lidarxistin. Jinan bi berzkirina dirûşmeya "Jin jiyan azadî" peyama ku wê bi hev re tundiyê rawestînin dan.
Di çarçoveya 25'ê Mijdarê Roja Têkoşîna Navneteweyî ya li Dijî Tundiya Li Hemberî Jinê de ji girtiyên jin ên Wanê re kart hatin şandin û li gelek bajarên din jî bi berzkirina dirûşmeya "Jin jiyan azadî" peyama ku wê bi hev re tundiyê rawestînin dan.
WAN
Li Wanê TJA û TUHAY-DER'ê di çarçoveya çalakiyên 25'ê Mijdarê de ji girtiyên jin re kartên piştevaniyê şandin. Jinên TJA'yê û nûnerên jin ên partiyên siyasî û rêxistinên sivîl ên bajêr li avahiya DEM Partiyê ya bajêr hatin cem hev û ji bo ji girtiyan re bişînin kart amade kirin. Paşê jin ber bi PTT'ê ve meşiyan. Di meşê de jinan gelek caran bênavber dirûşmeya "Jin, jîyan, azadî" û "Bijî berxwedana zindanan" berz kirin.
Jinên hatin ber avahiya PTT'ê, bi dirûşmeya "Jin, Jiyan, Azadî" ji girtiyên jin re kartên amade kiribûn şandin.
MÊRSÎN
Meclisa Jinan a DEM Partiyê ya Mêrsînê di çarçoveya çalakiyên 25'ê Mijdarê de bi jinên karker ên atolyeyên tekstîlê yên navçeya Akdenîzê re hevdîtin kir. Di serdanê de ku rêveberên bajêr û navçeyên Mêrsînê yên DEM Partiyê jî amade bûn, têkildarî girîngiya 25’ê Mijdarê agahî hatin dayîn û banga meşa ku dê di 25’ê Mijdarê de li Kolana Kuşîmato bê lidarxistin, hat kirin.
FARQÎN
Şaredariya Farqînê ya Amedê ku di bin rêveberiya Partiya Wekhevî û Demokrasiyê (DEM Partiyê) de ye, li Taxa Yenîşehîrê navê Rojîn Kabaîş a ku di meha Cotmehê de li Wanê hat windakirin, li parkeke bênav kir.
Şaredar Sevîm Bîçîciyê, malbata Rojîn Kabaiş, hevserokên bajêr û navçeyan ên DEM Partiyê û gelek welatî beşdarî navlêkirina li parkê û çalakiya dardanînê bûn.
DAR HAT DANÎN
Hevseroka DEM Partiyê ya Amedê Gulşen Ozerê diyar kir ku polîtîkayên li dijî jinê tên meşandin ne tesadufî ne û got ku jin ji ber mafên xwe û ji ber ku dibin dengê zarokan, xweza û azadiyê, hedef tên girtin.
Piştre Sevîm Bîçîcî axivî û wiha got: “Me navê parka xwe kir Rojîn Kabaiş ku ji jiyanê hat dûrxistin. Em ê ji bo her jineke jiyana xwe ji dest daye darekê biçînin. Em ê bi felsefeya 'Jin, jiyan azadî' pêvajoya avakirinê bidomînin. Dilê me êşbar be jî, dîsa em bi hêrs in. Em ê li dijî zîhniyeta ku jinan dikuje têkoşîna xwe berfirehtir bikin."
Piştî daxuyaniyê dayika Rojîn Kabaiş û beşdaran bi hev re li parkê dar çandin. Navê jinên hatin qetilkirin li darên hatin çandin hat kirin.
ERXENÎ
Hevşaredara Erxeniyê Birsen Azak Bayar û endamên meclisa şaredariyê li Kolana Mîlî Egemenlîk, Kolana Ziya Gokalp û navenda sûkê di çarçoveya kampanyay "Soza me neqediya, em ê tundiyê rawestînin" broşurên agahdarkirinê yên li dijî tundiya li ser jinê belav kirin.